Јувентус го победи Милан по 15-ти пат во 17 натпревари. Благодарение на головите на Марио Манџуки и Кристијано Роналдо и одбраната на голманот Војчех Шчесни, „Старата дама“ ги порази „росонерите“ на Сан Сиро со 2:0 во 12. коло од Серија А.
Тимот што апсолутно владее со италијанскиот фудбал поведе уште во осмата минута со голот со глава на Марио Манџукиќ, по одличната асистенција на Алекс Сандро од левата страна.
Потоа во 40-тата минута следеше почетокот на драмата и моментот што можеше да биде решавачки во Милано. Гонзало Игуаин сакаше да помине покрај Меди Бенатија во шеснаесетникот, а Мароканецот играше со рака. Судијата Мацолени се консултираше со ВАР и потврди – пенал за Милан.
Со овој гол ќе се изедначеше резултатот и значително ќе се сменеше динамиката на натпреварот.
Игуаин ја намести топката и сакаше да поентира против поранешниот матичен клуб, но промаши. Поточно, Шчесни одбрани со помош на левата статива и ги фрли во очај домашните навивачи.
Меѓутоа, за оваа одбрана најзаслужен е Роналдо кој му даде совет на голманот за тоа на која страна ќе шутира Аргентинецот. Роналдо долго време играше со Игуаин во Реал и добро ги знае неговите навики.
„Сите се знаеме многу добро. Знам дека Игуаин шутира пенали ниско и силно. Роналдо ме советуваше да се фрлам за дел од секундата порано бидејќи Пипита шутира силно“, рече голманот на Јувентус по натпреварот.
Откако го промаши пеналот, Игуаин беше нервозен и седум минути пред крајот на натпреварот доби црвен картон. Влезе во дуел за кој судијата му покажа жолт картон, но напаѓачот продолжи со протестирање и навреди кон Мацолени, па експресно следеше и вториот жолт и Аргентинецот мораше во солзи да го напушти теренот.