Ситуацијата во француската репрезентација не е идеална во пресрет на четвртфиналната пресметка со Хрватска во рамките на Лигата на нации.
Според пишувањата на француските медиуми, атмосферата во соблекувалната на Франција е далеку од идеална. Нарушени се и односите во тимот, а најгласен во сето тоа е Килјан Мбапе, кој веќе некое време нема најдобри односи со тренерот Дидје Дешан.
Мбапе наводно разговарал со челниците на ФФФ и им рекол дека многу играчи сакаат промена на клупата на репрезентацијата. Истакнал дека веќе постои идеално решение за наследникот на Дешан, а тоа е Зинедин Зидан.
Le Parisien пишува дека има сѐ повеќе играчи кои веруваат дека е време да се замени Дидје Дешан. Сметаат дека по 13 години на чело на репрезентацијата го достигнал својот пик и дека би била неопходна промена за да се освежи тимот и да се подготви за Мундијалот следната година во Канада, САД и Мексико.
Иако Македонија и други репрезентации мундијалските квалификации ги почнуваат сега, Французите ќе ги почнат или во јуни или во септември, во зависност од исходот на нивниот двомеч со Хрватите. Првиот натпревар го играат в четврток во Сплит, а реваншот е в недела во Сен-Дени. Доколку излезат како победници, тогаш во јуни ќе играат на фајнлфорот во Лигата на нации, а мундијалските квалификации ќе ги почнат во септември. А, пак, доколку загубат, тогаш во јуни ќе ги почнат квалификациите.
Дури и тоа во која група ќе играат квалификации им зависи од претстојната пресметка со Хрватска.
