Дресот со број 16 што го носеше Андреј Лазаров засекогаш повлечен во Тиквеш

Фудбалскиот клуб Тиквеш соопшти дека го повлекува дресот со број 16 кој во овој клуб го носеше Андреј Лазаров.

Лазаров беше една од жртвите во трагичниот пожар на 16 март во Кочани. Неколку сезони помина во клубот од Кавадарци, а кога загина беше фудбалер на Шкупи.

„Во чест и знак на благодарност за АНДРЕЈ ЛАЗАРОВ, фудбалер и голем херој кој со своите настапи многу придонесе за успесите на нашиот клуб, дресот со бројот кој тој го носеше во ГФК Тиквеш, трајно се повлекува од употреба и ќе остане како траен белег да ги краси клупските простории за негов вечен спомен“, објави Тиквеш.

Во текот на вчерашниот ден на плоштадот во Кавадарци беше отворена и книга на жалост во негова чест.

Лазаров за Тиквеш одигра 43 лигашки натпревари, постигна 4 голови и запиша 11 асистенции. Во својата кариера најмногу се задржа токму во кавадаречкиот клуб.