Кинески научници почнаа со ископување на два кинески бродови потонати во Јужното Кинеско Море, стари 500 години, кои се полни со порцелан и дрво.
Порцеланот датира од династијата Минг, а остатоците се пронајдени во близина на брегот на Кина во Јужното Кинеско Море. Ископувањето беше потврдено од кинеската Национална управа за културно наследство (NCHA) и претставува голем подвиг на археологијата на големи морски длабочини.
Во април 2018 година беа лансирани два истражувачки проекти за проучување на стари бродоломи, а беа пронајдени и неколку потонати бродови кои датираат од ерата на Минг. Некои од нив се полни со порцелан и дрво, додека еден содржи повеќе од 100.000 парчиња порцелан кој е во добро сочувана состојба.
Остатоците се наоѓаат на длабочина од околу 1.500 метри долж северната падина на Јужното Кинеско Море и го покажуваат правецот на бродовите кои се движат во спротивни насоки.
NCHA брзо се организираше, направи план и ги заштити и обнови ископаните културни реликвии.
Бродовите 1 и 2 го привлекоа посебното внимание на археолозите, бидејќи датираат помеѓу 1488 и 1521 година и го покажуваат видот на трговијата што се одвивала на таканаречениот Пат на свилата. Директорот на одделот за археологија на NCHA, Јан Јалин, рече дека реликвиите од потонатиот брод бр. 1 се расфрлани на морското дно на површина од околу 10 квадратни километри.
„Добро сочуваните реликвии имаат огромна историска, научна и уметничка вредност. Тоа би можело да биде археолошко откритие од светска класа. Откритијата се клучен доказ за постоењето на поморскиот Пат на свилата, како и голем напредок во историско проучување на кинеската прекуокеанска трговија, навигација и порцелан“, рече Јан.
До средината на јуни, истражувачите се надеваат дека ќе ја проценат дистрибуцијата на двата потонати брода и ќе планираат опсежно собирање податоци на локацијата, веројатно собирање примероци од рекликвиите и составот на морското дно околу нив.
