Пред неполн месец пишувавме дека научниците открија кој стои зад мистериозните убиства на ајкули во водите на Јужна Африка - сега излезе и снимка од нова таква случка.
Крвавата сцена на орки кои го кинат црниот дроб на голема бела ајкула долга 2,7 метри во водите околу заливот Мозел во Јужна Африка е снимена со камера на дрон.
Од пред неколку години локалните жители пријавуваат трупови на бели ајкули без црн дроб, кои се појавуваат во близина на брегот на Кејп Таун. Тоа го привлече вниманието на теренските научници, кои со години се обидуваат да откријат зошто тоа се случува.
Посочуваат дека оваа снимка е вредна и ќе им помогне да го проучат феноменот што доведе еден од најголемите предатори да избега од регионот кој до неодамна важеше за негова „светска престолнина“.
Снимката, која беше премиерно прикажана во четвртокот на Discovery, е резултат на долгогодишната работа на морскиот биолог Алисон Таунер, која објасни дека ова е „еден од најневеројатните настани во природната историја што е снимен на камера“.
До неодамна, големите бели ајкули беа вообичаени жители на водите во близина на брегот на Јужна Африка, поради големата популација на фоки кои се главен извор на храна за овој предатор. Меѓутоа, во последните неколку години нивниот број почна драстично да опаѓа, а поранешната популација од 900 ајкули се намали на 552. Сè до 2019 година, кога се појави веста дека големите бели мистериозно исчезнале од водите на брегот на Кејп Таун, Јужна Африка, и сите докази укажуваа на миграцијата на орките во регионот.
Преку внимателно набљудување, научниците дошле до заклучок дека станале плен на орка китовите. Иако многумина би помислиле дека големите бели имаат огромна предност во однос на орките, тоа не е случај бидејќи тие не можат да се натпреваруваат со нивните стратегии за групно ловење. Ако се земе предвид дека во периодот од 2010 до 2016 година на територијата на 1.000 квадратни километри од Атлантскиот Океан е забележано во просек присуство на 205 големи бели ајкули, додека во 2018 година биле пријавени само 50, а ниту една не била забележана оваа година, стана очигледно дека нешто ги плаши и ги оддалечува од нивното поранешно живеалиште.
„Истражувањето е важно затоа што со одредување како големите морски предатори реагираат на ризик, можеме да ја разбереме динамиката на коегзистенција со другите предаторски заедници“, објасни Таунер. Гансбеј порано беше светски познато место за белите ајкули, каде туристите од целиот свет доаѓаа да нуркаат во кафез. Денес речиси и да ги нема.
Други објаснувања за падот на бројот на бели ајкули во областа вклучуваат риболов, намалување на пленот предизвикан од риболов или зголемување на температурата на површината на морето. Сепак, иако тоа може само делумно да ги погоди, малку е веројатно дека ова е единствената причина за толку остар пад на популацијата за само неколку години.
„Орките се насочени кон возрасни големи бели, што може дополнително да влијае на веќе ранливата популација, благодарение на нивниот бавен раст и доцното созревање“, објаснува таа.
