Не стивнува бурата што ја разбранува британската пејачка со албанско потекло Дуа Липа, која побара од компанијата Apple да ја стави на мапа Косово како независна држава, но во други граници од постојните.
Дуа Липа, која има статус на една од најпопуларните поп-пејачки во светот во моментов, пред неколку дена на Twitter и на Instagram објави фотографија со која ја промовира политичката идеја за „Голема Албанија“ која би опфатила делови од денешна Србија, Грција, Република Северна Македонија и Црна Гора, со коментар дека косовските Албанци се „староседелско население“ на оваа територија.
24-годишната Дуа е родена во Велика Британија, а нејзините родители се косовски Албанци кои заминале од Приштина во 1992 година.
Овие објави предизвикаа бурни реакции кај корисниците на социјалните мрежи, но и бројни јавни личности, меѓу кои и британскиот новинар Сем Стрит кој искоментира дека Дуа Липа „ги нарекува овие нации мигранти или колонисти, што е прилично иронично за Албанка родена во Вестминстер, Велика Британија“.
Дуа Липа доби поддршка од низа нејзини колешки со албанско потекло и светска слава.
На пример, Рита Ора, која има 6,7 милиони следбеници на Twitter објави фотографија на која пишува „Ставете го Косово на мапа“ и ја тагна компанијата Apple и неколку популарни пејачки со албанско потекло: Бебе Реџа, Ава Макс, Дафина Зеќири, Ера Истрефи и Дуа Липа.
Таа во објавата нагласи дека е за ширење „љубов, мир и единство“, а Ава Макс ја ретвитна објавата.
Поостра беше Дафина, која напиша: „Apple, чекаме... ова е срамота! Најмногу бидејќи станува збор за американска компанија, а САД ја признаа независноста на Косово на 17 февруари, 2018 година. Зошто уште нѐ нема на мапата?“