Државната комунална компанија во Дубаи заврши со работа на соларната електрана со капацитет од 200 мегавати, еден месец порано од предвиденото и во рамките на планот до 2030 година да го изгради најголемиот соларен комплекс на светот.
„Првично беше предвидено соларната електрана во вредност од 327 милиони долари да биде завршена во април“, изјави Мохамед Ал Тајер, извршен директор на комуналната компанија.
Тој додаде дека Управата за електрична енергија и вода на Дубаи ќе откупува енергија од оваа електрана по цена од 5,6 центи за киловат-час.
Дубаи планира до 2030 година да го заврши комплексот со капацитет од 5.000 мегавати, како дел од напорите да ја намали зависноста од природен гас како главен извор на електрична енергија.