Дамата Џуди Денч на 85 години блеска на насловната страница на британскиот Vogue.
Со тоа британската актерка и активистка стана најстарата ѕвезда од насловната страница во 104-годишната историја на „модната Библија“.
По речиси 60 години филмска и театарска кариера, Денч влезе и во модната историја со тоа што е фокусот на јунското издание на британскиот Vogue.
Во централниот прилог за списанието, оскаровката исто така е децидна дека не размислува за пензионирање.
„Не, не, не, не! Не го кажувај тој збор во куќава“, низ смеа вели Денч, па го цитира Дилан Томас: „’Rage, rage against the dying of the light’ (Пркоси, пркоси на згаснувањето на светлината). Нема поголема вистина од тоа.“
Денч е во самоизолација во нејзиниот дом поради пандемијата со COVID-19.
„Сигурна сум дека се чувствувам како повеќето луѓе, тешко е да се сфатат вакви невидени времиња. Ако има нешто добро во целото ова е што луѓето се повеќе свесни за тешкотиите со кои се соочуваат луѓето кои се сосема сами. Ако станеме подобри едни со други после ова, тоа ќе биде плус“, вели дамата Денч.
Џуди Денч дебитираше на театарската сцена во 1957 година, а првата филмска улога ѝ беше во 1964 година во „The Third Secret“. Од бројните улоги оттогаш, за пошироката публика е најпозната по филмовите за Џејмс Бонд, како и филмот „Shakespeare in Love“ што ѝ донесе Оскар во 1998 година.