Проблеми за македонската олимписка репрезентација пред утрешното свечено отворање откако знаменоската Реџепи мораше да биде ставена во изолација.
Имено, Арбреша Реџепи за време на летот од Франкфурт до Токио имала близок контакт со лице кое потоа излегло позитивно на тестирањата за COVID-19 и согласно правилата е ставена во делумна изолација.
Тоа значи дека таа со посебен транспорт може да оди на тренинзи, но нема да може да присуствува на церемонијата на отварањето на Игрите.
Согласно новите правила на ИОК, секоја репрезентација на отворањето треба да има машки и женски знаменосец. Со оглед на развојот на настаните, Реџепи дефинитивно отпаѓа, а МОК не објави дали нејзиното место ќе го преземе каратистката Пуликсенија Јованоска или пливачката Миа Блажевска-Еминова.
Свеченото отворање е утре од 13 часот по македонско време со директен пренос на МРТ1.
Реџепи на олимписките борилишта треба да се појави в недела во категоријата 52 килограма, а истиот ден ќе се одржат и борбите за медал во нејзината категорија.
