Според првичните информации од Изборниот штаб на дебарскиот огранок на ДУИ, кандидатот на оваа партија, Хекуран Дука е новиот градоначалнк на Дебар.
Дука се заблагодари на дадената доверба и вети дека ќе биде градоначалник на сите граѓани независно од етничка, верска или партиска припадност, онака како што не правел разлика во давањето лекарска услуга.
– Мојата канцеларија ќе биде отворена за секого, независно дали гласал или не за мене. Ние сме сите дебарчани и сите му посакуваме добро на нашиот град и општина. Ветувам дека максимално ќе се заложам да ги реализирам сите мои ветувања,со цел да ја намалиме миграцијата на младите и да го претвориме Дебар во европски град. Од срце ви благодарам на сите, рече Дука.
Д-р Хекуран Дука е роден 1963 година во Дебар, оженет, татко на три деца. Средно образование завршил во родниот град, дипломирал на Медицинскиот факултет во Скопје, каде завршил специјализација по урологија. Вработен е во Општата болница во Дебар од 1994 година.
На последните локални избори, во 2017 година, беше дел од кандидатската листа на ДУИ и беше избран за советник во Советот на општината.
Тој е вршител на должноста градоначалник на Дебар.
Кандидатот за градоначалник на Дебар Арбен Аголи од Алијансата за Албанците го призна поразот на денешните предвремени локални избори за градоначалник на Дебар.
Аголи со своите соработници пристигна во седиштето на огранокот на ДУИ и му ја честиташе победа на Дука. И двајцата се лекари специјалисти и подолг период заедно работеле во Општата болница во Дебар.
Пред седиштето на дебарскот огранок на ДУИ веќе се слави.
Според првичните резултати Дука добил 450 гласови повеќе. Со речиси идентична разлика Аголи загуби во вториот круг на локаланите избори во октомври 2017 кога по вторпат беше избран Ружди Љата, кој почина во ноември минатата годна, по кусо и тешко боледување.
