Кошаркарот на Голден Стејт Вориорс мораше да оди на операција два дена откако доживеа тешка повреда во финалето на НБА лигата. Тој ја повреди Ахиловата тетива и мораше да му биде извршен медицински зафат, по кој ќе следува долга пауза од терените.
Добитникот на МВП наградата од изминатите две финалиња, Кевин Дурент, синоќа помина низ операција на Ахиловата тетива, која ќе го оддалечи од терените најмалку половина година, но не е исклучена опцијата и тој да ја пропушти целата наредна сезона.
„Сакав да ве известам за мојата ситуација: навистина ја повредив Ахиловата тетива. Операцијата се случи денеска и помина успешно. Патот до заздравување започнува веднаш!“, напиша Дурент под фотографијата објавена на неговиот Instagram профил.
Шестиот натпревар помеѓу Голден Стејт Вориорс и Торонто Репторс ќе се одигра вечерва во Оукленд во 3 часот по полноќ според локално време. Доколку Вориорс стигнат до победа, тогаш ќе ја израмнат серијата на 3-3 и ќе се игра седми натпревар во Торонто. Во спротивно, Репторс ќе ја освојат првата титула во историјата на клубот.
