Најкорисниот играч во последните две финалиња на американската професионална кошаркарска НБА лига, Кевин Дурент (29), го продолжи договорот со актуелниот првак Голден Стејт Вориорс, објавено е во неделата.
Иако Вориорс не ги објави деталите од договорот, американските медиуми пренесуваат дека Дурент ставил потпис на двегодишен договор за 60 милиони долари.
Во текот на овогодинешната финална серија, во дуелот против Кливленд, Дурент просечно постигнуваше 28,8 кошеви, 10,8 скокови, 7,5 асистенции и 2,0 блокади. Во текот на сезоната забележуваше по 26,4 поени, со по 6,8 скокови и 5,4 асистенции.
Тимот со најдобар однос помеѓу победи и порази во лигашкиот дел од минатата НБА сезона, Хјустон Рокетс, објавија дека го продолжиле договорот со Крис Пол, на уште четири години.
Според пишувањата на американските медиуми, Пол во тој период ќе заработи дури 160 милиони долари.