Филипинскиот претседател Родриго Дутерте ја одби помошта од претставниците на Европската унија, кои го повикаа неговата брутална војна со трговците со дроги во земјата да ја решава со помош на програма за рехабилитација.
Како што пренесува агенцијата Reuters, ЕУ усвоила резолуција, во која го повика филипинскиот претседател кон повоздржани методи во борбата против трговијата со дрога во земјата, предложувајќи му воспоставување програма за рехабилитација на зависниците.
„ЕУ ни се обратија нам, тие сакаат решение на проблемот со дрогата во рамките на здравството. Тие се кучкини синови“, го цитира агенцијата филипинскиот претседател Дутерте, кој додал дека дека на неговата земја не ѝ се потреби ЕУ и „идиотските“ програми за рехабилитација.
Филипинскиот претседател, избран во мај, 2016 година, почна широка и бескрупулозна борба против трговијата со наркотици.
Според последните податоци на ОН, од периодот кога Дутерте ја презеде власта во Филипините, се убиени повеќе од 6.000 луѓе поврзани со трговијата со дроги.
Меѓународната заедница постојано ги осудува методите кои ги применува филипинскиот претседател.
На критиките кои доаѓаат од меѓународните организации за човекови права, ОН, САД и ЕУ, Дутерте редовно одговара со остри и навредливи изјави, сметајќи дека тоа се мешања во внатрешните работи на неговата земја.