Филипинскиот лидер Родриго Дутерте изјави дека претседателската работа не е за жени поради нивните емоционални разлики со мажите, па ја отфрли шпекулацијата дека ќерката ќе го наследи идната година, пренесе CNN.
„Мојата ќерка нема да се кандидира. Ѝ реков да не се кандидира бидејќи жал ми е да минува низ тоа што јас минувам. Оваа работа не е за жени, емоционалниот распоред кај мажите и жените целосно се разликува“, објасни Дутарте.
75-годишниот претседател е озогласен поради неговите изјави кои најчесто се навредливи и сексистички, но од неговиот кабинет велат дека всушност станува збор за безопасни шеги.
Тој и понатаму е популарен меѓу женските гласачи на Филипини. Неговата ќерка, 42-годишната Сара Дутерте-Карпиo, која го наследи на местото градоначалник на Давао, се најде на првото место на неодамнешната анкета која побара од јавноста да одбере идеален кандидат од листата можни претседателски кандидати за изборите во 2022 година.
Филипини досега имале две претседателки на државата, Глорија Макапогал Арохо и Корасон Акуино.