Први позитивни во домашниот фудбал меѓу денешните 62 новозаразени. Шестмината се од двата тетовски прволигаши.
Масовните тестирања во македонските фудбалски клубови ги открија првите случаи на заразени во домашниот фудбал. Вчера во Тетово тим на „Аџибадем Систина“ земаше примероци од фудбалерите и стручниот штаб на клубовите Шкендија и Ренова.
„Денес за жал немаме убава вест. По вчерашните тестирања во двата тетовски клуба ФК Ренова и ФК Шкендија имаме позитивни случаи на COVID-19. По повторената анализа во лабораторијата на „Аџибадем Систина“ за жал имаме позитивни случаи. Информацијата ја имавме уште касно синоќа, но чекавме повторена анализа. Затоа денешните тренинзи на овие два клуба беа откажани. Имињата на заразените се уредно доставени до ФК Ренова и ФК Шкендија во текот на денот. Позитивните на COVID-19 веднаш ќе бидат ставени во самоизолација и домашен карантин.
Четворица позитивни има во таборот на ФК Ренова и двајца во таборот на ФК Шкендија“, велат од Синдикатот на фудбалери на Македонија, организација која посредува и ги покрива трошоците за тестовите.
Имињата на заразените не се откриваат, а не е потенцирано дали се фудбалери и тренери. Денешните резултати може да го искомплицираат најавеното продолжување на сезоната во 1.МФЛ.
