На Клиниката за инфективни болести во Скопје починаа две лица од заразна болест. Станува збор за лица од гостиварско, кои се во крвно сродство, но засега од Клиниката не потврдуваат дали станува збор за татко и син.
Едниот е на возраст од 24 години, а другото лице имало околу 50. На клиниката биле примени со дијареја и покачена телесна температура, но болеста брзо прогресирала и ги зафатила бубрезите, црниот дроб и системот за коагулација.
Директорот на клиниката Звонко Миленковиќ вели дека се уште се истражуваат причините за болеста. Се сомневаат дека се работи за болест која се пренесува преку добиток. Од комисијата за заразни болести смируваат да не се создава паника меѓу населението, бидејќи според нивните сознанија, болеста тешко се пренесувала од човек на човек.
На Инфективната клиника, како што изјави Миленковиќ нема карантин, туку се работи за изолација на пациенти. Во моментов има уште четири лица задржани на клиниката, од кои дел се крвно поврзани со починатите.
Се вршат испитувања за да се утврди за кое заболување се работи.