Деветте близнаци кои пред една година ги роди Халима Сисе го прославија својот прв роденден.
„Сега сите лазат. Некои седат и можат да одат ако се држат до нешто“, изјави татко им Абделкадер Арби за BBC.
„Понекогаш е дури и заморно, но кога ќе ги погледнете сите тие бебиња во совршено здравје, чувствувате олеснување. Забораваме на сè “, вели нивната 26-годишна мајка, која признава дека не е лесно да се грижиш за толку многу бебиња, но се надева дека ќе им биде полесно кога ќе пораснат.
Бебињата го соборија Гинисовиот рекорд за најголем број родени и преживеани деца. Во пресрет на породувањето, владата на Мали ја транспортира Халима во Мароко на специјализирана нега.
Таа ги роди бебињата во 30-тата недела од беременоста, со царски рез. Две од момчињата ги добија имињата Мохамед и Бах, по претседателот на Мали и кралот на Мароко. Родителите решиле да го направат тоа за да им се заблагодарат на властите на земјите кои им помогнале бебињата безбедно да дојдат на свет. Другите две момчиња се викаат Елхаџи и Оумар, додека на девојчињата им се дадени имињата Хава, Адама, Фатума, Оуму и Кадидија.
Неколку месеци подоцна, се појави вест дека една жена, по име Госијаме Ситоле, родила десет бебиња во Јужна Африка. Но, подоцна се дозна дека тоа не е вистина, и дека таа воопшто не е бремена, па 37-годишната жена беше задржана на опсервација во психијатриска установа. Не се познати причините зошто ја измислила оваа приказна.