Иако родителите, особено оние од постарата генерација, често не разбираат која е „залуденоста“ по видеоигрите, ако имате некоја така повредна, треба да им го ставите тоа до знаење.
На пример, ако имате игра што вреди многу и по која колекционерите лудуваат, треба да ја чувате на безбедно место.
Колекционер од Њујорк ја научи оваа лекција на потешкиот начин. Својата вредна колекција ретро видеоигри и конзоли ја чувал во куќата на неговите родители, а дури неодамна открил дека мајка му фрлила добар дел од таа колекција во ѓубре.
Веројатно не била свесна за што станува збор и едноставно сакала да ја исчисти куќата, па затоа фрлила дел од колекцијата вредна над 500.000 американски долари.
Колекционерот изјави дека останал без еден куп видеоигри за PS1 и постари, а повеќето од нив никогаш не биле отпакувани. Конзоли како Famicom, Ataris, Coleco, MegaDrive завршија во контејнер, а колекционерот откри дека отишла и неговата колекција стрипови.
Сума од 500.000 долари за стари видеоигри можеби ви звучи лудо, но и тоа е малку кога ќе земете предвид дека некои од тие видеоигри со тек на време и вределе и многу повеќе.
Наравоучение: ако во куќата на вашите родители чувате колекционерска видеоигра или ретро конзола во совршена состојба, подобро веднаш јавете им се за да не ви се случи ова.