Печурките се одличен додаток на секое јадење, а со овој рецепт можат да станат и главен оброк. Лесно се прават, а состојките можете да ги прилагодите според вашите сопствени преференции.
Наместо шунка, можете да користите други сувомеснати производи, како и мелено месо. Исто така, освен основните зачини, можете да користите и магдонос, лук и слично.
Потребни состојки:
- поголеми шампињони
- кашкавал по ваш избор
- шунка
- маслиново масло
- сол
- бибер
Подготовка:
Внимателно исчистете ги печурките со четка. Не ги мијте бидејќи ќе ја впијат водата и нема да бидат вкусни. Извадете им ги стеблата и исечкајте ги. Печурките премачкајте ги со масло и посолете ги. Наредете ги во тавче обложено со хартија за печење.
Исечкајте ја шунката (или некој друг сувомеснат производ) на парчиња и изрендајте го кашкавалот. Можете да користите и мелено месо, но мора да го зачините пред полнењето. Во секоја печурка ставете ја шунката и сечканите стебла и посипете со рендан кашкавал. Исто така, можете дополнително да користите пармезан.
Печете ги печурките во загреана рерна на 190 степени околу 20 минути. Послужете ги додека се топли, а можете дополнително да ги декорирате со свеж магдонос или други билки.
