Протестите на „жолтите елеци“ во Франција, кои траат подолго од еден месец, ги поттикнаа и останатите да ги следат, по што слични собири најавуваат и во Хрватска.
Поттикнати од успехот на француските демонстранти, слични протести почнаа да се одржуваат и во другите европски земји, како Белгија и Холандија, а сега слично движење се формира и во Хрватска.
На социјалната мрежа Фејсбук е отворена група „Жолти елеци Хрватска“, која моментално брои околу 10.000 луѓе. Групата е создадена од вонпарламентарната партија Слободна Хрватска.
Првите протести на хрватските „жолти елеци“ се најавени за оваа сабота во три градови Загреб, Пула и Риека, со почеток во 12 часот.
Организаторите на протестите ги повикуваат сите оние кои се незадоволни од социјалниот статус и состојбите во политичкиот и општествениот живот.
Земјоделци во „жолти елеци“ го блокираат сообраќајот во Варшава
Земјоделците кои протестираат во Полска вчера ја блокираа главната сообраќајница во Варшава, најавувајќи дека барикадите ќе останат сè додека премиерот Матеус Моравјецки не ги сослуша нивните проблеми. Тие носат жолти елеци, слични на демонстрантите во Франција.
Десетици земјоделци вчераутро спонтано се собраа на автопатот и го блокираа сообраќајот на неколку часа, предизвикувајќи километарски колони источно од Варшава. Во попладневните часови се разотидоа.
Земјоделците се жалат поради немањето државен надомест за загубата предизвикана од уништувањето на свињите заради запирање на ширење на болеста свинска куга. Тие се противат и на увозот на странски производи и бараат на прехранбените производи задолжително да е наведена земјата на потекло.
„Жолтите елеци“ пристигнаа и во Албанија
Бран протести завчера попладне ја зафатија цела Албанија, а дел од учесниците на собирите се појавија во жолти елеци по примерот на демонстрантите во Франција.
Освен студентите, кои протестраа веќе осми ден, на протести излегоа и граѓани од повеќе градови, незадоволни од високите цени на горивата и електричната енергија, како и од сиромштијата.
Жителите на поширокиот регион на Курбин, го блокираа автопатот Тирана-Кукс, барајќи намалување на цената на горивата и на електричната енергија, како и на даноците. Тие носеа пароли на кои беа напишани пораки против Владата на премиерот Еди Рама.
Паралелно со ова, протести се одржаа и во Скадар, Корча, Валона, Фиер, Елбасан, Драч и Пешкопеја, кои беа пропратени со блокирање на национални патишта и оние кои водат кон граничните премини, како и на автопатот Драч-Тирана.
Еден од најчесто извикуваните слогани на протестите беша „Рама оди си“.
„Жолтите елеци“, како што веќе се нарекоа демонстрантите, најавија масовен протест на 15 декември во 18 часот во Тирана под мотото „Дојди да протестираш за нафтата“.
Преку нивната Фејсбук страница тие ги повикуваат сите албански граѓани да протестираат против „високата цена на нафтата и нејзниот најслаб квалитет во регионот“.
