Во голем стил калчолигашот Рома го одигра последниот пријателски натпревар пред почетокот на новата сезона, а навивачите приредија одлично шоу оставајќи ги играчите во неверување во каква атмосфера ќе ја играат сезоната.
Доаѓањето на Жозе Мурињо на клупата на Рома ги подигна апетитите. Рома е назад меѓу италијанските великани, така вели и летниот преоден рок во кој тимот успеа да се засили со еден мега напаѓач како Пауло Дибала.
Синоќа Рома играше натпревар против украински Шахтар од Донецк, а иако се работеше за пријателски среде летните одмори, на трибините се појавија неверојатни 65.303 гледачи.
Навивачите пред почетокот направија неверојатна атмосфера кога во еден глас ја отпеаја клупската химна „Roma, Roma, Roma“ од Антонело Вендити. Дибала гледаше со запрепастување кон трибините додека ечеа стиховите на познатиот италијански кантавтор. Не бадијала многу странски фудбалери рекле дека Рома ја има најдобрата атмосфера на трибините.
Инаку, Рома славеше против Шахтар со 5:0 со головите на Лоренцо Пелегрини, Џанлука Мначини, автоголот на Јухим Конопља, Николо Ѕаниоло и Едоардо Бове. Токму Ѕаниоло доби громогласен поздрав и ако досега не знаеше дали направил правилен избор со останувањето во Рома, сега тоа сигурно му е повеќе од јасно.
Иако при неговото официјално претставување кога потпиша за Рома доби моќно добредојде, Дибала и овој пат беше бурно поздравен.
Најновото засилување на „Римјаните“, Џорџињо Вајналдум, кој дојде од редовите на ПСЖ, исто имаше прилика да ја почувствува моќната атмосфера на „Олимпико“.
