Во финалето на најдобрата кошаркарска лига на Стариот континент сезонава ќе се сретнат турски Анадолу Ефес и шпански Реал Мадрид откако синоќа во Белград славеа над своите противници.
Првиот полуфинален натпревар беше егејско дерби меѓу грчки Олимпиакос и турски Анадолу Ефес, а по голема драма славеше клубот од Истанбул со 77:74, кој всушност е и бранител на тронот.
Натпреварот беше решен во последните секунди, а херој на Ефес е српскиот кошаркар Василије Мичиќ, кој погоди тројка. Мициќ ја задржа топката до последната секунда и погоди тројка за Грците да немаат шанса да се обидат да израмнат.
Најефикасен во победничкиот тим беше Шејн Ларкин со 21 поен, а Елајџа Брајант додаде 16. Кај Олимпиакос Шекил МекКисик постигна 11.
Второто полуфинале го донесе големото Ел Класико и дуелот помеѓу Реал Мадрид и Барселона. И тука видовме голема драма, а на крајот Реал се радуваше на победата со резултат 86:83.
Херој беше Фабјан Козер кој врза 5 поени во последната минута и го донесе Реал во финалето на Евролигата.
Никола Миротиќ беше најефикасен на натпреварот со дабл-дабл учинок од 26 поени и 12 скока, но тоа не беше доволно за Барселона.
Од друга страна, споменатиот Козер постигна 18 поени, исто колку и Гершон Јабуселе, кои го предводеа Реал до триумфот.
Финалето на Евролигата е закажано за в сабота од 19 часот во белградската „Штарк Арена“, а ќе се сретнат Анадолу Ефес и Реал Мадрид. За турскиот клуб ова ќе биде 9-то финале, а ќе го брка четвртиот пехар, додека рекордерот Реал по 19-ти пат ќе игра финале и ќе ја брка 11-тата титула.