По контроверзниот твит во кој Илон Маск тврдеше дека египетските пирамиди ги изградиле вонземјани, доби покани да ја посети земјата и лично да се увери што пишува во самите пирамиди за нивната изградба.
Египетскиот археолот Захи Хауас во напис за Egypt Today му одговори на Маск за неговото контроверзно тврдење.
„Тој страда од тотална халуцнација. Во гробниците во самите пирамиди јасно е напишано како се тие изградени. Пишува дека градителите биле Египќани и не биле робови. Нека дојде и нека види. Она што Маск сакаше да го каже е дека античните Африканци не биле способни и дека работеле оковани во синџири за некоја интергалактичка раса“, изјави Хауас.
Сопственикот на Tesla и на SpaceX продлжи да ја развива дискусијата на Twitter со тоа што објави напис од BBC објавен во 2011 година додавајќи: „Овој текст на BBC дава разумно објаснување за тоа како биле изградени“.
Теоријата дека вонземјани ги изградиле пирамидите во Египет не е воопшто нова. Популарната серија „Ancient Aliens“, која веќе стигна до својата 15-та сезона, одамна тврди дека има непобитни докази дека во градењето на Кеопсовата пирамида е вклучена вонземна технологија и дека вистинската намена на пирамидата не е гробница.
Кеопсовата пирамида е најголемата пирамида и во нејзините одаи нема никакви натписи кои ја објаснуваат нејзината изградба. Натписите за кои говори Хауас се наоѓаат во помалите пирамиди, за кои е неспорно дека ги изградиле античките Египќани.
