Еј Си Грин остана познат во НБА круговите како „Железниот човек“ поради неговата неуништливост на теренот. Тој го држи рекордот за најмногу последователни натпревари во кои настапил, со 1.192. Но, покрај тоа, тој е култен лик и поради неговата одлучност да нема секс додека не стапи во брак, иако во играчките денови му приоѓале многу девојки.
Неговите соиграчи многу често за време на гостувањата му праќале девојки во собата каде што Грин спиел, за да го натераат да има секс со нив, но тој останал верен на религијата и секогаш ги одбивал.
Еј Си Грин имаше богата НБА кариера која се протегаше низ цели 16 години. За целото тоа време тој пропушти само 3 натпревари, одигрувајќи 1278 од можни 1281 натпревар, а трите натпревари кои ги пропушти беа во неговата втора сезона во лигата, поради повреда.
Тој беше дел од популарните „Showtime“ Лејкерси, кои во средината и доцниот дел од 80-те години освојуваа титули предводени од Меџик Џонсон и Карим Абдул Џабар. Грин заедно со овој тим освои две титули, за потоа да ја продолжи кариерата во Феникс Санс и Далас Маверикс, пред да се врати во Лос Анџелес и да освои уште една титула со тимот на Лејкерс, заедно со Коби Брајант и Шекил О’нил.
Сепак, неговото најголемо достигнување беше надвор од теренот. Тој е многу религиозен човек и уште пред да ја почне професионалната кариера дал завет дека нема да има секс пред да стапи во брак. И додека неговите колеги имале секс скоро секоја вечер, некогаш и со повеќе девојки одеднаш, тој апстинирал. Надвор од теренот Грин беше многу смирен, благодарен човек, но на теренот беше нетипично див, нескротлив и вистински шампион.
Брзо по завршувањето на кариерата тој се венчаше со неговата сегашна сопруга Вероника и конечно ја изгуби невиноста.
Доколку ве интересира неговата приказна, овој НБА шампион и Ол-Стар ја раскажува во краткиот документарен филм за неговиот живот, „30 for 30 Story“. Тој и понатаму е истиот допадлив човек со кој лесно се комуницира и во моментов тој работи за доброто на општеството и општината каде што живее.
