Mundo Deportivo на насловната страница на денешното издание објави фотографии од дресовите што Барселона наводно ќе ги носи од сезоната 2022/2023.
Весникот, кој религиозно ја следи Барселона, објави ексклузивни фотографии од трите сета. Првиот потсетува на дресот на Барса од почетокот на овој милениум кога Ривалдо и другите ѕвезди носеа црвено-син дрес со потемни детали. Mundo Deportivo пишува дека новиот дрес ќе има црвени, сини и екстремно темно сини вертикални ленти и дека спонзорот и имињата на играчите на задната страна ќе бидат напишани со златни букви.
Вториот сет е златен, кој Барселона често го користи, но третиот сет, кој, особено одзади, изгледа како дрес на Реал Мадрид, привлече најголемо внимание. На предната страна е крстот на Сант Џорди во црвено-сина комбинација, а остатокот од дресот е со многу светла боја. Mundo Deportivo пишува дека станува збор за светлосива нијанса, но посочува дека многу ќе изгледа бело на телевизија, што можеби не им одговара најмногу на фановите.
„Nike ја опиша бојата како ‘небесно сива’, а Барселона го прифати предлогот на техничкиот спонзор. Барселона еднаш во историјата играше во бела комбинација, во времето на Јохан Кројф“, се вели во текстот.
Што се однесува до вториот, златниот сет, тој е посветен на градот Барселона и 30-годишнината од Олимписките игри. Шпанија на тие игри освои златен медал во фудбал, предводени од Гвардиола и Ферер, а финалето се одигра на „Камп Ноу“.