По речиси еден месец од Европското првенство во Германија, ни останува само финалето. Англија стигна до таа фаза втор пат по ред. Избраниците на Гарет Саутгејт во полуфиналето ја совладаа Холандија со 2:1 и изборија дуел со Шпанија за трофејот европски шампион. Холанѓаните рано поведоа со прекрасниот гол на Чави Симонс, но Хари Кејн брзо одговори од белата точка. Кога се чинеше дека натпреварот ќе оди во продолженија, се појави Оли Воткинс кој погоди во 90-тата минута.
Ден по натпреварот, една од главните теми на англиските и светските медиуми е пеналот кој беше досиден за Англичаните, кој многу навивачи го сметаат за многу контроверзен. Да потсетиме, во таа ситуација Кејн шутираше кон голот на Холандија, а Дензел Думфрис невнимателно влезе во блок. Откако англискиот напаѓач веќе ја шутна топката и го промаши голот, во продолжението на акцијата дојде до контакт со ногата на Думфрис.
Главниот судија на натпреварот, Феликс Цвајер, на почетокот не досуди ништо, но на сугестија од ВАР собата ја прегледа снимката и покажа на белата точка. Голем број англиски експерти, како што се поранешните играчи Гари Невил и Џејми Карагер, се согласија дека тоа не е пенал. Сепак, стручњак за ВАР ја појасни судиската одлука.
Дејл Џонсон, експертот за ВАР, објасни зошто се огласиле од ВАР собата и му предложиле на судијата да дојде и да го погледне видеото. „Зошто му беше предложено на Цвајер дека ова е пенал? Поради природата на ударот на Думфрис, кој имаше крампоните од ѓонот свртени кон Кејн додека тој се обидуваше да ја шутне топката“, започна Џонсон.
„Тоа се смета за невнимателен, непромислен старт и тоа е и причината поради која холандскиот играч доби жолт картон. Тоа е една ситуација во фудбалот каде што стартот дури и по удар може да се протолкува како прекршок - кога стартот е непромислен или опасен“, додаде тој.
На стадионот веднаш по одлуката дека е досуден пенал на семафорот се појави објаснување. „Пенал - играчот на Холандија со бр. 22 направи непромислен старт над противникот во обид да игра со топката“, гласеше пораката на екранот.
