Чиле побара од ФИФА да истражи дали Еквадор во квалификациите за Светското првенство настапувал со играч кој немал право да игра за таа држава.
Во жалбата поднесена од Фудбалската федерација на Чиле (ФФЦ) до Дисциплинската комисија на ФИФА се тврди дека Еквадорецот Бајрон Кастиљо е всушност Колумбиец и дека ја фалсификувал неговата возраст.
ФФЦ тврди дека Кастиљо користел лажен извод од матична книга на родените и националност за да се регистрира како Еквадорец.
Ако е вистина, според правилата на ФИФА, Еквадор би можел да го загуби местото на Светското првенство.
Еквадор заврши на 4. место во јужноамериканските квалификации и избори директно место во Катар пред Перу, кој мора да игра интерконтинентален бараж против Австралија или ОАЕ во јуни. Колумбија заврши на 6. место.
Но, Чиле ги цитира правилата на ФИФА и вели дека Еквадор треба службено да ги загуби осумте натпревари на кои настапи Кастиљо, а на противниците да им бидат доделени по 3 бода за секој од нив.
Така Чиле, кој заврши седми, ќе ги прескокне Колумбија и Перу на 4. место кое води во Катар.
Такво нешто се случи во квалификациите за Мундијалот 2018 во Русија кога Боливија службено загуби неколку натпревари поради играч за кој се утврди дека немал право да игра за оваа репрезентација. Но, тоа се случи уште додека квалификациите беа во тек.
„Постојат безброј докази дека играчот е роден во Колумбија, во градот Тумако, на 25 јули 1995 година, а не на 10 ноември 1998 година, во еквадорскиот град Хенерал Виљамил Плајас“, се вели во соопштението на Чиле.
Во соопштението се тврди дека Фудбалската федерација на Еквадор знаела дека играчот е Колумбиец, додавајќи: „Светот на фудбалот не може да ги затвори очите пред толку многу предизвици. Практиката на сериозни и свесни неправилности во регистрацијата на играчите не може да се прифати. Мора да има фер игра на и надвор од теренот“.
Националноста на Кастиљо, наводно, била разгледувана од еквадорските власти и ФЕФ во текот на неколку години, пред играчот на крајот да биде избран за националниот тим минатата година.
Овие вести од Јужна Америка допреа и до Италија која сѐ уште не може да се помири со елиминацијата од Македонија во мартовските баражи и втор Мундијалот по ред кој ќе го пропушти.
Италијанците се надеваат дека натпреварите на Еквадор нема да бидат поништени и табелата од квалификациите во Јужна Америка нема да претрпи промени, туку дека Еквадор едноставно ќе биде исфрлен од Мундијалот и едно место ќе биде празно.
Доколку такво сценарио навистина се случи, тогаш Италијанците го цитираат членот 6 од Статутот на ФИФА, кој вели: „Доколку некој учесник се откаже или биде исфрлен од едно натпреварување, ФИФА ќе одлучи по ова прашање по сопствена дискреција и ќе преземе какви било дејствија што ќе ги смета за неопходни“. Односно, дека ФИФА самата ќе одлучи која репрезентација да го заземе местото на Еквадор.
Во секој случај тешко е за верување дека европска репрезентација, а не јужноамериканска, би го земала местото на Еквадор. Зошто Европа би добила едно место плус на сметка на Јужна Америка? При такво сценариот КОНМЕБОЛ сигурно не би седел мирно.