Најголемото дерби на шпанскиот фудбал и една од најголемите пресметки во светот на фудбалот, дуелот на Барселона и Реал, ќе се одигра денеска на „Ноу Камп“ во Барселона.
Барселона и Реал во популарното „Ел Класико“ ќе се соочат по 264-ти пат, на претходните 263 средби Барселона е поуспешна има 109 победи, наспроти 96 на големиот мадридски ривал, а 58 мечеви завршиле без победник. Гол разликата е на страната на Барселона 458:431.
Во Барселона гигантите на шпанскиот фудбал одиграле 85 натпревари, Барса има 49 победи, Реал славел 19 пати, а 17 натпревари завршиле без победник.
Првиот меѓусебен дуел оваа сезона, одигран во Мадрид, заврши со убедлива победа на Барселона 4:0. Барса се наоѓа во неверојатна серија, од 39 мечеви без пораз. Последен пат Барселона загубила на 10 октомври минатата година во Севилја.
Барселона сезонава не загубила натпревар кога нејзините играчи први постигнале гол.
Лионел Меси, официјално најдобриот светски фудбалер, е најдобриот стрелец во историјата на овие дуели. Аргентинецот постигнал 22 гола во дуелите против Реал, четири повеќе од легендата на Реал Алфредо Ди Стефано, а зад нив се Роналдо и Раул со по 15 голови.
Кога станува збор за настапите во „Ел Класико“, од активните играчи, рекордери се Андрес Иниеста и Серхио Рамос кои имаат одиграно по 21 натпревар. Воопшто рекордот според бројот на настапи го држат Ченто и Санчиз од Реал, односно Чави од Барселона кои одиграле по 42 натпревари.
На „Ноу Камп“ ќе истрчаат најдобрите пет стрелци во тековната сезона во Примера. Кристијано Роналдо е лидер на таа листа со 28 голови, два помалку има Луис Суарез од Барселона, потоа следуваат Меси (22), Нејмар (21) и Бензема (20).
„Ел Класико“ ќе биде дуел на двата најдобри напади во Примера, Реал има постигнато 87 голови, еден повеќе од Барселона.
