Шпанскиот производител го претстави својот прв електричен мотоцикл, MO eScooter 125.
Електричниот скутер на Seat се напојува со електричен мотор интегриран во задното тркало, кој стандардно развива 9 КС (7 kW) и во кратки интервали може да произведе и 12 КС (9 kW), додека максималниот вртежен момент е 240 Nm.
Забрзува од 0-50 км/ч за 3,9 секунди, пред да достигне максимални 95 км на час.
Електричната енергија се складира во литиум-јонска батерија од 5,6 kWh, што може да се извади од скутерот и се полни на штекер во вашиот дом, ако тоа ви одговара повеќе отколку да го полните на јавен полнач на паркинг.
Сепак, ова можеби нема да биде погодно за секого, имајќи предвид дека тежината на батеријата е 41 кг. Времето на полнење е 6-8 часа, а максималната автономија на овој скутер е 137 км.
Seat MO eScooter 125 ќе пристигне во шпанските салони веќе во ноември, а потоа ќе започне да се продава и во некои други европски земји.
Во Шпанија, скутерот чини 6.250 евра, што е околу половина од цената на моделот Ibiza на тој пазар, или 3.650 евра помалку од најевтиниот Seat, малиот градски автомобил Mii.
