Сите наши „Италијанци“ настапија за своите клубови синоќа, а двајца се радуваа на победи.
Наполи на Елиф Елмас го пречека Удинезе на Илија Несторовски. Елмас почна од клупата, додека Иле ги одигра комплетните 90 минути за гостите кои први поведоа во 22. минута преку Родриго де Паул. Наполи израмни во 31. минута преку штотуку влезениот Аркадиуш Милик кој го замени повредениот Дрис Мертенс.
На десет инути пред крајот Елмас влезе во игра на местото на Фабијан Руис. Неговиот тим во 4. минута од судиското надополнување со одличниот удар на Матео Политано ја однесе победата. Елмас и Несторовски околу петнаесетина минути играа еден против друг.
Горан Пандев и неговата Џеноа играа вистинско дерби за опстанкот против директниот конкурент Лече. Уште во 7. минута Пандев одлично го пронајде Антонио Санабрија во гостинскиот шестнаесетник и овој ја затресе мрежата на Лече.
Во надополнувањето од првиот дел Пандев загуби една топка по што Лече тргна во контра која резултираше со прекршок за пенал. Капитенот Марко Манкозу не ја искористи приликата шутирајќи над голот. Лече сепак дојде до израмнување во 60. минута токму преку Манкозу.
На 9 минути пред крајот резервистот Филип Јагјело упати удар од работ на шестнаесетникот, Пандев се помести за да не ја допре топката која заврши во стативата, а од неа во рамото на паднатиот голман Габриел и назад во гостинската мрежа. Тимот на Пандев со среќен автогол освои големи три бода со кои сега има разлика од 4 бодови во однос на Лече кој остана на последното место кое води во Серија Би.
Дербито на денот се одигра на „Олимпико“ во Рим каде Рома и Интер ги поделија бодовите играјќи 2:2. Интер поведе преку Стефан де Врај во 15. минута кога со глава ја затресе домашната мрежа. Во надополнувањето Леонардо Спинацола израмни на 1:1, а во 57. минута домаќините дојдоа до пресврт преку Хенрих Мхитарјан. Интер спаси бод од белата точка на две минути до крајот кога сигурен реализатор беше Ромелу Лукаку.
Вечерва од 21:45 часот се игра дербито на колото помеѓу Јувентус и Лацио.
