Лајпциг утре во второто коло во Лигата на шампионите ќе го пречека Јувентус. Германскиот тим во првото коло доживеа пораз во Мадрид од Атлетико, додека Јувентус стартуваше со победа над ПСВ.
Во пресрет на натпреварот, за официјалната клупска веб-страница дуелот го најави македонскиот репрезентативец Елиф Елмас.
„Секогаш е тешко да се игра против италијански тимови, особено против Јувентус, тоа е еден од најголемите клубови во Италија. Одиграв многу натпревари против нив и знам колку опасни можат да бидат. Се бранат добро, тоа го покажува сегашната статистика. Но, исто така се многу флексибилни и опасни во нападот. Генерално се добри. Јас сум оптимист, очекувам возбудлив натпревар“, изјави Елмас.
За жал, македонскиот репрезентативец не се очекува да игра. Тој сезонава е резерва за Лајпциг и речиси и да не добива шанса ниту од клупата, а викендов не ни беше во составот поради повреда.
