Елиф Елмас излезе негатинен на COVID-19 на вториот тест чии резултати Наполи ги објави синоќа. За жал, сепак останува во изолација и не може да ѝ се приклучи на репрезентацијата.
Вчера утрото целиот тим на Наполи вклучувајќи ги играчите од првиот тим, стручниот штаб и младинскиот тим направи втори тестови за коронавирусот. Резултатите беа објавени вчера вечерта.
„Сите од тимот се негативни на COVID-19 на тестовите направени утрово. Недостасува само резултатот на Станислав Лоботка кој сѐ уште не е процесиран. Позитивен е само еден фудбалер од младинскиот тим“, извести Наполи на Twitter.
Тоа значи дека и нашиот Елиф Елмас е помеѓу негативните. Тој беше позитивен на првото тестирање и поради тоа беше ставен во изолација и воедно отпадна од репрезентацијата за денешниот бараж со Косово.
Негативниот тест не значи дека Елмас ќе може да дојде и да се стави на располагање за останатите два натпревара, в недела со Естонија и в среда во Грузија од Лигата на нации, бидејќи мора превентивно да остане во изолација според италијанските превентивни мерки за заштита од ширење на вирусот.