Фудбал

Елмас одигра одлични 57 минути во поразот од Барса

8. август 2019 - 8:40 | Ф.З.

Ноќеска Елиф Елмас беше стартер за Наполи против силната Барселона која го совлада неговиот тим со 2:1 на неутрален терен во Мајами.

Македонскиот бисер ја доби довербата на Карло Анчелоти и го започна натпреварот од првата минута, а остана на теренот сѐ до 57-мата кога на негово место во игра влезе Џанлука Гаетано, 19-годишен играч од младинскиот погон на „партенопеите“.

Додека беше на теренот Елмас одигра одлично против силниот противник, беше доста активен и истрча многу. Позитивни критики доби од навивачите на Наполи на социјалните мрежи кои се оптимисти дека нивниот клуб направил одлична трансфер инвестиција.

Секунди пред да биде заменет Елмас беше остро фаулиран од Серхио Бускец, остана да лежи на тревникот по што по интервенција на медицинскиот тим кривејќи ја напушти играта.

Додека 19-годишниот Елмас беше во игра резултатот беше 1:1. Поведе Барса со голот на Бускец во 38-мата минута, а со автогол израмни Самуел Умтити три минути пред полувремето. Победничкиот гол падна во 79-минута благодарение на Иван Ракитиќ.

Во сабота двете екипи ќе одиграат реванш, но овој пат во Детроит.

Коментирај