Македонскиот репрезентативец Елиф Елмас денеска слета на миланскиот аеродром „Малпенса“ од каде се упати кон Торино, каде се очекува во текот на денот да го официјализира преминот во популарните „Граната“.
На аеродромот „Малпенса“ веднаш доби шал Торино и беше снимен како го напушта терминалот.
За попладнево се закажани медицинските прегледи во спортскиот комплекс во склоп на стадионот „Олимпико Гранде Торино“.
Елмас не се наигра во Лајпциг каде дојде од Наполи, иронично, во потрага по поголема минутажа. За една година настапи на само 22 натпревара, не постигна гол и само еднаш асистираше. Конечно се реши да замине од Бундеслигата и се враќа во проверена средина, во Калчото, каде ги мина најубавите моменти од кариерата.
Во Наполи мина 4 и пол сезони играјќи на 189 натпревари во сите натпреварувања кои ги зачини со 19 голови и 11 асистенции. Освои и едно Скудето и една Копа Италија.
Во Торино 25-годишниот македонски бисер доаѓа на позајмица до крајот на сезоната, а италијанските медиуми пренесуваат дека „Граната“ на лето ќе има право да го откупи за 18 милиони евра. Тој ќе стане првиот македонски фудбалер што заиграл за овој великан.
Неговиот нов клуб по 22 кола во Серија А е на 10. место со 26 бодови и се надева дека ќе успеа да дојде до местата кои водат во Европа.
Инаку, Торино е заспан џин со 7 освоени Скудета, но последното во 1976 година.
