Елон Маск ги претстави новите соларни покриви кои на прв поглед не се разликуваат од обичните покриви. Наместо на постојните покриви да се поставуваат дополнителни соларни панели, во иднина самите покриви ќе бидат прекриени со нови соларни плочки.
Станува збор за проект меѓу SolarCity и Tesla. Новата технологија може да се комбинира и со батеријата Powerwall 2, новиот производ вреден 5.500 долари. Новата батерија ќе биде двојно подобрена од претходната, што се продаваше за 3.500 долари. Соларните плочки можат да имаат елементи за греење како оние за греење стакло на автомобили, за топење на снег од покривите, како и за создавање и складирање енергија.
Ќе бидат достапни во 4 верзии, а засега цената не е позната. Маск најави дека новата технологија ќе биде поевтина опција од поставувањето на обичниот покрив или дополнителното поставување соларни панели.
„Се надевам дека ова е иднината што ја сакате“, изјави Маск на презентирањето во Лос Анџелес.
