Компанијата Space X на милијардерот Елон Маск ја лансираше ракетата Falcon Heavy, најмоќната што постои на светот, со која во вселената се лансираше автомобилот на Маск – Tesla Roadster.
Во автомобилот со боја на вишна на местото на возачот има кукла, а на воланот бишува „Без паника“, алудирајќи на познатиот роман „Автостоперски водач низ галаксијата“ на Даглас Адамс, а на еден од деловите во внатрешноста пишува „направено од луѓе на Земјата“.
Секако, додека траеше лансирањето во позадина одеше песната „Space Oddity“ на Дејвид Боуви.
Маск веднаш потоа на социјалните мрежи објави речиси надреално видео во живо од вселената во кое се гледа како автомобилот и куклата лебдат околу нашата планета.
Автомобилот некое време ќе лебди околу Земјата, а потоа ќе се упати кон Марс.
Ракетата Falcon Heavy има два пати поголема носивост од другите ракети и може да понесе 64 тони товар, што е повеќе од Boing 737 со патници, екипаж на лет, багаж и гориво.
„Tesla Roadster ќе замине на 400 милиони километри од Земјата и ќе се движи со брзина од 11 километри во секунда“, рече Маск во понеделникот на прес-конференција и додаде дека според проценките, автомобилот ќе кружи во вселената неколку стотици милиони години.
Овој подвиг значи дека во иднина значително ќе се олесни праќањето на поголеми сателити, телескопи и поголеми и поспособни роботи во вселената кои би работеле на површината на Марс или би патувале до Јупитер или Сатурн.
Многу важен дел во целиот овој проект е дека сѐ се прави со многу помали трошоци, а тоа е крајната цел на Маск – евтино патување во вселената.
На пример, едно лансирање на ракетата Falcon Heavy се проценува дека чини 90 милиони долари, а слична ракета на НАСА би чинела околу 1 милијарда долари.
Исто така треба да се земе предвид дека Space X е приватна компанија.