Вашингтон, 18 ноември 2019 (МИА) – Директорот на компанијата за вселенска технологија SpaceX, Елон Маск најави дека ќе му бидат потребни 20 години и 1.000 вселенски бродови за да изгради град на Марс, што е негова долгорочна визија.
Одговарајќи на обожавателите на Twitter, Маск изјави дека SpaceX ќе мора да конструира околу 1.000 вселенски летала за транспорт на товар, инфраструктура и членови на екипажот на Марс во текот на 20 години, со оглед на тоа дека планетарното порамнување овозможува лет на Марс само еднаш во две години.
Маск неодамна изјави дека неговите трошоци за лансирање изнесуваат само околу два милиони долари по лет на вселенски брод, и дека крајната цел е да изгради „град кој ќе биде самоодржлив на Марс“.
Но, за да се воспостави постојан, одржлив град на Марс, прво мора да пристигне екипаж. Претходно е потребно уште нешто – а тоа е слетување на астронаут на Месечината. Тоа НАСА го постави како своја цел до 2024, а SpaceX се надева дека таму ќе се спушти брод уште во 2022 година.
