Елон Маск го преживеа обидот да му ја одземат клучната улога во „Tesla“ кога акционерите правеа реизбор на тројца директори во одборот на производителот на електрични возила.
Еден инвеститор сакаше на Маск, основач и главен извршен директор на „Tesla“, да му биде одземена улогата на претседател на одборот. Во американските компании двете улоги обично ги држи истиот човек.
Предлогот беше ставен на гласање на годишниот состанок на „Tesla“ во Маунтин Вју, Калифорнија што се одржа вчера.
Компанијата го искористи состанокот за да ја најави најновата „гигафабрика“ што ќе се гради во Шангај, со соопштение дека кинеската фабрика доаѓа „многу наскоро“, рече Маск.
Обидот да му биде одземена улогата на претседател на одборот беше најголемиот удар на моќта на Маск во „Tesla“, каде тој има удел од 20%.
Дел од инвеститорите беа вознемирени од проблемите со кои се соочува компанијата во поглед на производството на Model 3 што е од клучно значење за долгорочната профитабилност на компанијата.
Маск рече дека достигнувањето на целта да се произведуваат 5.000 Model 3 возила неделно до крајот на месецот е „многу веројатно“, имајќи предвид дека сега се произведуваат 3.500 возила неделно.
„Ова беа најпеколните неколку месеци во мојот живот... ама мислам дека се доближуваме до целта“, рече тој пред инвеститорите.
„Тука во Tesla правиме автомобили со љубов“, рече Маск видно емотивен.
„Во многу други компании прават автомобили со маркетинг или со секторот за финансии и тоа нема душа. Не сме совршени, но оставаме срце и душа во она што навистина ни значи.“
„Tesla“ пријави рекордна квартална загуба од речиси 710 милиони долари за трите месеци до март, што е повеќе од двојно во споредба со загубата во истиот период лани.
Вредноста на акциите на компанијата беше променлива во изминативе месеци и падна на околу 252 долари за акција во април. „Tesla“ уште се вреднува на речиси 50 милијарди долари, што е речиси 5 милијарди долари повеќе од автопроиводителот „Ford“.
