Европската агенција за лекови (ЕМА) соопшти дека секоја земја треба сама да одлучи како ќе го третира нивниот заклучок дека по приемот на вакцината AstraZeneca постои ризик од згрутчување на крвта.
При донесување на одлуката секоја земја треба да ја земе предвид моменталната епидемиолошка состојба и достапноста на другите вакцини, соопшти ЕМА, пренесувана од британските медиуми.
-Ние се обидовме да обезбедиме што е можно повеќе информации за придобивките и ризиците што ги идентификувавме, и врз основа на тоа, но и земајќи ја предвид моменталната состојба со пандемијата и можноста за набавка на други вакцини, државите можат да донесат различни одлуки за вакцината AstraZeneca, изјави директорката на ЕМА, Емер Кук.
ЕМА на овој начин се откажа од давање препораки и државите ќе мора да ги проценат ризиците од продолжување на употребата на вакцината AstraZeneca.
Во изминатите десет дена неколку земји ја забранија употребата на AstraZeneca за лицата под 60 или 55 години, со очекување дека конечната одлука ќе ја донесе ЕМА, но сега тие ќе треба сами да ја донесат.
Треба да се истакне дека во Франција веќе се поднесени првите тужби поради смртта на луѓе по примањето на вакцината AstraZeneca.