Капитенот на холандската репрезентација Вирџил дан Дајк направи прекрасен потег по средбата на неговата репрезентација со германската, кога му пријде на главниот судија Овидиј Хатеган и се обиде да го утеши бидејќи неодамна имал смртен случај во потесното семејство.
По последниот судиски свиреж, Хатеган го совладааа емоциите и почна да плаче, а Ван Дајк побрза да го прегрне и да го утеши романскиот судија.
Покрај пријателската прегратка, Ван Дајк му упатил на Хатеган и пофалби дека одлично го судел натпреварот.
„Му пријдов на Хатеган на крајот на мечот за да го поздравам и да го прашам како е. Ми одговори дека се чувствува лошо бидејќи неодамна починала мајка му и потоа се скрши и почна да плаче. Го прегрнав и му реков дека одлично судеше, знам дека не направив премногу, но се надевам дека барем малку му помогнав“, рече Ван Дајк.
Ваквиот потег на фудбалерот на Ливерпул ја одушеви светската јавност и уште еднаш ја покажа најубавата страна на фудбалот – солидарноста. Оваа сцена ќе биде запаметена како една од најемотивните и најинспиративните во 2018 година во светот на фудбалот.
