Енцо Фернандес се извини за навредите кон Африканците што играат за Франција

Репрезентативец на Аргентина, Енцо Фернандес, се извини за навредите кон Французите за време на прославата по освојувањето на Копа Америка.

Аргентинците во неделата го добија финалето на Копа Америка против Колумбија со 1:0 и ја одбранија титулата, а за време на прославата Енцо Фернандес се сними себеси и неговите соиграчи како пеат навредлива песна за Французите, алудирајќи на африканското потекло на многу членови на „Ле Блу“.

„Играат за Франција, но нивните родители се од Ангола. Мајка им е од Камерун, а татко им е од Нигерија. Во нивниот пасош пишува Франција“, пееја аргентинските фудбалери.

Француската фудбалска федерација (ФФФ) веднаш ги пријави Аргентинците во ФИФА, на кои сега им се заканува голема парична казна.

Соиграчите на Фернандес од Челси, Аксел Дизаси, Мало Густо и Весли Фофана веднаш го отследеа Аргентинецот на Instagram, а Фофана во една објава напиша: „Фудбалот во 2024: Незапирлив расизам“.

Сега се огласи и Фернандес кој рече дека не е расист.

„Искрено се извинувам за видеото на мојот Instagram за време на прославата. Песната содржи многу навредлив јазик и нема оправдување за тие зборови. Секогаш сум против дискриминација и се извинувам затоа што ме зафати еуфоријата од славењето на Копа Америка. Тоа видео, тој момент, тие зборови не се одраз на моите верувања, ниту на карактерот“, напиша Фернандес на Х.

Но, штетата е веќе направена и Челзи отвори внатрешна истрага што секако ќе резултира со казнување на Фернандес.

Дел од англиските медиуми пишуваат дека покрај суспензијата и паричната казна, една од можностите е Аргентинецот да се стави на трансфер листа доколку француските фудбалери на лондонскиот клуб не сакаат да ја делат соблекувалната со Фернандес.