Клучот за убавината на стареењето е во прифаќањето, а актерката Енди Мекдауел (64) одамна ја прифати оваа мудрост. Таа гордо ја носи седата коса, но и гордо се соочува со бројни критики.
И додека холивудските актери, како Џорџ Клуни, во подоцнежните години добиваат епитети на атрактивни мажи чија седа коса ја истакнува нивната природна убавина, холивудските актерки, од друга страна, не добиваат таков третман. Двојните стандарди во американскиот свет на славните навистина се забележливи, а Енди Мекдауел со остри зборови ги одбива сите „добронамерни“ предлози кога станува збор за седата коса.
„Моите менаџери всушност ми рекоа: ‘Не е дојдено времето’. А јас одговорив: ‘Мислам дека не сте во право, ќе бидам помоќна ако се прифатам себеси“, рече актерката за нејзината одлука да се појави во јавност со седа коса.
„Кога го направив тоа, ми беше толку јасно дека моите инстинкти се во право бидејќи никогаш не сум се чувствувала помоќна. Се чувствувам поискрено. Се чувствувам како да не се преправам. Се чувствувам како да се прифаќам себеси тука каде што сум. Се чувствувам удобно. И на многу начини, мислам дека тоа ми се гледа на лицето. Едноставно чувствувам дека ми одговара“.
Мекдауел се осврна на лицемерието кое владее со светот на Холивуд, а нејзината седа коса ја спореди со косата на Клуни, прашувајќи зошто таа е проблематична во тој поглед, а тој не е .
„Ги сакаме постарите мажи. Ги сакаме мажите како што стареат. Посакувам истото да важи и за постарите жени и се движиме кон тоа. Она што би сакала сите да го направиме е да застанеме и да размислиме како размислуваме за зрелите мажи и како размислуваме за зрелите жени и навистина да почнеме да оценуваме што зборуваме и што очекуваме. Мораме! Има промени кои треба да се направат за мојата генерација и за следната генерација жени. Сакам само луѓето да размислуваат за тоа, тоа е сè “, изјави Мекдауел, која додава дека не е помалку убава со седа коса, туку дека е само убава на поинаков начин.
