Компанијата Epic Games ќе мора на играчите да им врати 245 милиони долари поради неовластени наплаќања, како и да плати казна од 275 милиони долари поради кршење на Законот за заштита на приватноста на децата во онлајн светот.
Epic Games се согласи да плати 520 милиони долари за да се ослободи од тужбата за прекршување на Законот за заштита на приватноста на децата во онлајн светот (COPPA) преку собирањето лични податоци од деца помлади од 13 години, како и тактиките кои биле наштелувани за да ги наведат играчите ненамерно да купат по нешто.
Компанијата од сојузната американска држава Северна Каролина ќе плати казна од 275 милиони долари поради прекршување на COPPA законот, што претставува најголема изречена казна за прекршок од ваков тип. Во посебен предлог одлука се наведува и дека Epic Games дополнително ќе плати 245 милиони долари за повраток на пари на купувачите поради наводните „темни обрасци“ и начинот на наплата, што претставува највисок износ на вратени пари во историјата на гејминг индустријата.
Темните обрасци се намерно дизајнирани елементи кои се користат во апликациите, игриците или на веб-страниците за крајниот корисник да се наведе на направи ненамерен потег, како пријава за newsletter, кликнување на нешто што не го саака или дури и да купи нешто.
Како што наведува Федералната комисија за трговија (ФТЦ), Epic Games користел таква тактика во својата игрица „Fortnite“ со употреба на збунувачки конфигурации на копчињата.
„На играчите можело да им се наплаќа додека се обидувале да го отклучат својот уред, додека игрицата се наоѓала во процес на вчитување или со притискање на соседното копче додека се обидувале да прегледаат некој предмет“, наведува агенцијата.
Оваа тактика резултирала со стотици милиони долари од неовластена наплата.
Исто така, Epic Games се најде во фокусот на ФТЦ поради забраната за пристап до купената содржина откако сопствениците на уредите почнувале процес на оспорување на неовластената наплата на својата кредитна картичка.
Во објавеното соопштение од Epic Games изјавија дека ниеден девелопер на игрици не создава игрици со намера да се најде во ваква ситуација, додавајќи дека го прифаќаат договорот бидејќи сакаат да бидат на чело на заштитата на потрошувачите и да им пружаат најдобро искуство на своите играчи.
