Германските ракометари се пласираа во полуфиналето на Олимписките игри откако по продолженијата го совладаа домаќинот Франција со 35:34, а во регуларниот дел натпреварот заврши 29:29. Овој натпревар беше последен во кариерата за великанот на светскиот ракомет, Никола Карабатиќ.
Франција и Германија одиграа натпревар што долго ќе се прераскажува. Ќе се потенцира нереалната партија на францускиот голман Венсан Жерар, брилијантната игра на 22-годишниот натурализиран Германец (Латвиец) Ренарс Ушчинс и глупоста на Дика Мем.
Германците од работ на безбдната се вратија во мечот, изборија продолженија и на крајот победија со голот на Ушчинс на 5 секунди до крајот. Во последниот напад, Давид Шпет го одбрани ударот на Валентан Порт.
А, Германија избори продолженија, откако Мем ја направи најголемата глупост во кариерата, на 6 секунди до крајот лошо ја уфрли топката, Јулиан Кестер ја украде, а Ушчинс го совлада Жерар.
Претходно Франција доминираше 40 минути, благодарение на голманот Жерар и Мем. Имаа Французите предност од 20:14 во 32. минута, но упорните Германци со две серии од 4:0 и 5:1 го презедоа водството (26:25) на 5 минути до крајот.
Жерар на голот на Франција одбрани 20 удари и 3 седмерци, Мем постигна 10, а Иго Деска 8 гола. Кај Германија, Ушчинс постигна 13 голови, Јоханес Гола и Зебастиан Хејнман по 6, а Јури Кнор 5. Голманот Шпет блескаше со 14 одбрани.
Во полуфиналето покрај Германија претходно пласман избори и Шпанија која, исто така, на продолжение го победи Египет со 29:28. Денеска играат уште Данска - Шведска (17:30) и Норвешка - Словенија (21:30).
