Претседателот на Турција, Реџеп Тајип Ердоган изјави дека целта на оваа земја е да развие „челична купола“, односно сеопфатен систем за противвоздушна одбрана, додавајќи дека Анкара ќе го зголеми и својот арсенал на ракети со долг дострел.
„Сега многу подобро разбираме колку се витални сеопфатните системи за противвоздушна одбрана за нашата безбедност. Ако тие (Израел) имаат ‘железна купола’, ние ќе имаме ‘челична купола’. Нема да ги гледаме и да се чудиме зошто го немаме“, рече Ердоган. Тој не прецизираше конкретна временска рамка за оваа цел.
Ердоган рече дека Турција ќе го зголеми својот арсенал на ракети со долг дострел.
„Турција нема да мирува додека не постигне целосна независност во одбранбената индустрија“, рече турскиот претседател.
Како членка на НАТО, Турција значително ја намали зависноста од странски добавувачи на воена и одбранбена опрема во последниве години, стана водечки производител на борбени беспилотни летала за глобалниот пазар и самостојно ги произведува поголемиот дел од своите одбранбени потреби, објави Reuters.
