Турскиот претседател Реџеп Тајип Ердоган смета дека украинската криза ќе трае долго, нагласувајќи дека соработува со Русија и дека ѝ верува „не помалку од Западот“, пренесуваат медиумите во регионот.
„Немам причина да не ѝ верувам на Русија. Колку што е сигурен Западот, толку е и Русија. Во последните 50 години стоевме на прагот на Европската Унија и во овој момент ѝ верувам на Русија не помалку отколку на Западот“, рече Ердоган во интервју за PBS.
„Половина од увозот на природен гас доаѓа од Русија, што значи наша солидарност. Одиме напред со заеднички чекори, соработуваме и во одбранбената индустрија. Сето тоа можеме да го направиме заедно со Русија“, додаде претседателот.
Според него, Анкара и земјите-членки на ЕУ имаат различни ставови за Руската Федерација.
„Русија е еден од моите најблиски соседи. Имаме и заедничка историја“, рече Ердоган.
Тој смета дека конфликтот во Украина „ќе трае долго“. Сепак, „Турција се надева дека тоа ќе заврши што е можно поскоро“, рече претседателот.
Ердоган истакна дека Москва „навистина сака да стави крај на конфликтот што е можно поскоро“, пренесе Спутник.
