Турскиот претседател Реџеп Тајип Ердоган изјави дека Турција нема да биде застрашена од заканите во врска со нејзиниот пристапен процес во ЕУ и повторно ја нарече Европската унија (ЕУ) „фашистичка“.
„Тие со тоа повеќе не можат да ни се закануваат. Сега е готово“, рече Ердоган во Анкара, мислејќи на пристапниот процес и договорот за мигрантите.
Исто така, додаде дека Турција повеќе нема да им дозволи на Европејците да „шпионираат“ на турска територија под разни изговори. Ваквата забелешка се однесуваше на Дениз Јучел, уапсениот новинар на германскиот весник Die Welt, кој има двојно државјанство, и турско и германско. Ердоган за Јучел рече дека е „терористички агент“ што се криел во конзулатот.
Турскиот претседател рече дека по референдумот во април Турција би можела да ги разгледа односите со Европа.
„Оваа Европа е Европа од пред втората светска војна. Расистичка, фашистичка и сурова Европа“, рече Ердоган, обвинувајќи ја ЕУ дека е непријателски настроена кон Турците и муслиманите.
Ердоган продолжи да не избира зборови и покрај предупредувањата од германската канцеларка Ангела Меркел, да престане да ја споредува германската влада со нацистичкиот режим.