Турскиот претседател Реџеп Таип Ердоган изјави дека ќе продолжи да ги нарекува европските земји нацисти сè додека тие него го нарекуваат диктатор.
„Тие имаат слобода Ердоган да го нарекуваат диктатор, но Ердоган нема слобода да ги нарекува фашисти и нацисти. Го велам ова без некој да се навреди. Јас ќе продолжам да ги користам сите изрази, додека тие ме нарекуваат диктатор”, изјави тој во интервјуто што беше емитувано на СНН Турк и на канал D.
Турскиот претседател исто така изрази жалење во врска со забелешките на германскиот претседател Франк-Валтер Штајнмаер, кои беа упатени против него, објави турскиот весник “Дејли сабат”.
„Германскиот претседател Штајнмаер рече нешто против мене, иако ние сме добри пријатели. Жал ми е за неговата изјава. Посакувам тој никогаш тоа да не го изјавеше”, заклучи Ердоган.
Штајнмаер во својот прв претседателски говор рече дека Ердоган се заканува да го уништи сето она што неговата земја го направи во изминатите години, а тоа исто така ги загрозува односите со турските партнери, потсетува турскиот весник.