Бидејќи во Италија е забрането да се бават со фудбал луѓе кои имаат срцеви прпблеми, Кристијан Ериксен се врати во татковината и почна да тренира со Оденсе.
Ериксен е член на Интер, но не тренираше со овој клуб бидејќи законите во Италија строго го забрануваат тоа. Откако колабираше на првиот натпревар на неговата Данска на ЕУРО 2020 против Финска, на Ериксен потоа му беше направена операција при што му беше вграден дефибрилатор, направа која му помага на неговото срце.
Договорот на Ериксен со Интер е до јуни 2024 година, но јасно е дека за овој клуб нема да може да игра поради правилата во Италија кои забрануваат играчи со дефибрилатори да играат фудбал. Клубот одамна објави дека ќе продолжи да му дава плата на Ериксен, но играчот има намера повторно да се врати на зелениот терен, а тоа ќе може да го направи само во клуб од друга држава.
Ериксен се врати назад во Данска каде почна да тренира со Оденсе, клубот од кој изникна и тоа точно 173 дена откако доживеа срцев удар. Сѐ уште не тренира со останатите фудбалери бидејќи неговата кондиција не му го дозволува тоа. Тренира индивидуално и полека полека ќе се обиде да му се врати на фудбалот.
Данецот никогаш нема одиграно официјален натпревар за Оденсе бидејќи уште како 16-годишник замина во Ајакс. Таму остана пет сезони па замина во Тотенхем каде по седум години направи трансфер во Интер.