Европската комисија ги повика членките на ЕУ и Шенген зоната да го продолжат временото ограничување на патувањето меѓу земјите на уште 30 дена.
Ограничувањето се однесува на сите патувања на граѓаните од трети земји кои не се од суштинско значење, а се применува на надворешните граници на ЕУ, вклучувајќи ги и земјите од Шенген кои не се во ЕУ – Исланд, Лихтенштајн, Норвешка и Швајцарија.
Од Комисијата порачуваат дека без оглед на првичните чекори на земјите членки на ЕУ за олабавување на мерките против COVID-19, „ситуацијата уште е деликатна, како во Европа, така и ширум светот“.
Комесарката за внатрешни работи Илва Јохансон повтори дека е неопходен координиран и постепен пристап за функционирање на Шенген просторот.
„Ограничувањата што се однесуваат на слободното движење и контрола на внатрешните граници ќе мора постепено да се укинуваат пред да ги укинеме ограничувањата за надворешните граници и да обезбедиме пристап за граѓаните кои не доаѓаат од ЕУ“, рече таа.
Европската комисија во рамки на мерките за спречување на ширењето на COVID-19 на 16 март првпат ги повика земјите членки на ЕУ и Шенген зоната да воведат привремено ограничување на влез за сите патувања што не се од суштинско значење. Оваа мерка на 8 април беше продолжена за уште 30 дена.
